सिन्डिकेटका पक्षधर स्टक ब्रोकर चलखेलमा- भाग खोसिने भएपछि दुष्प्रचार गर्दै

काठमाडौं । अदालतबाट टुंगिएको विषयमाथि गम्भीर आरोप लगाएपछि धितोपत्र दलाल व्यवसायीहरूको संस्था स्टक ब्रोकर्स एसोसिएसन अफ नेपाल विवादमा मुछिएको छ । सर्वोच्च अदालतको फैसलापछि नेपाल धितोपत्र बोर्डले ४३ वटा नयाँ कम्पनीलाई स्कट ब्रोकरका निम्ति आशयपत्र (एलओआई) दिएको थियो । उक्त एलओआई दिँदा आर्थिक चलखेल भएको ब्रोकर एसोसिएसनको आरोपलाई प्रमाणित गर्न आशयपत्र पाउने नयाँ कम्पनीहरूले चुनौती दिएसँगै स्टक ब्रोकर एसोसिएसन विवादमा तानिएको हो ।

पुराना ब्रोकरहरूको संस्थाले आधारहीन तथा कपोकल्पित आरोप लगाएको भन्दै कानुनी उपचार खोज्ने चेतावनीसमेत नयाँ ब्रोकरहरूले दिएका छन् । उनीहरूले ‘न्यू ब्रोकर एसोसिएसन नेपाल’ नामक नयाँ संस्था प्रस्ताव समेत गरेका छन् । सर्वोच्च अदालत, मन्त्रिपरिषद्, अर्थ मन्त्रालय र धितोपत्र बोर्डलगायतका संस्थाले गरेको निर्णयलाई अपव्याख्या गर्दै आधारहीन कुरामा ब्रोकरहरूको छाता संगठनले विज्ञप्ति निकाल्नु अपरिपक्वता भएको स्वयम् पुराना ब्रोकरहरूको भनाइ छ ।