संवैधानिक संकटको डिलमा कोशी प्रदेश

विराटनगर । कोशी प्रदेशको सत्ता समीकरण परिवर्तनसँगै दोस्रो प्रदेशसभा संवैधानिक संकट उन्मुख छ । नेपाली कांग्रेसका सभापति शेरबहादुर देउवा, माओवादी केन्द्रका अध्यक्ष तथा प्रधानमन्त्री पुष्पकमल दाहाल ‘प्रचण्ड’, नेकपा एकीकृत समाजवादीका अध्यक्ष माधवकुमार नेपाल र जसपाका अध्यक्ष उपेन्द्र यादवले यो कुरालाई गम्भीरतापूर्वक नलिए उक्त संकट निकट भविष्यमै देखिने कतिपय नेताहरुले बताएका छन् ।

सो संकट भनेको प्रदेशसभाको विघटन हो । त्यसको संकेत नयाँ सरकार गठनसँगै देखा परिसकेको छ । आगामी साउन ७ गतेदेखि सर्वोच्च अदालतले गर्ने निरन्तर सुनुवाइपछिको फैसलाले त्यसलाई अझै स्पष्ट पार्ने सत्ता गठबन्धनकै नेताहरु बताउँछन् । कोशी प्रदेशका मुख्यमन्त्री उद्धव थापाको नियुक्ति प्रक्रियामा प्रश्न उठाउँदै निवर्तमान मुख्यमन्त्री तथा नेकपा एमाले संसदीय दलका नेता हिक्मतकुमार कार्कीले सर्वोच्चमा परमादेश माग गर्दै रिट निवेदन दिएका छन् ।