लामाबगर नाका सुन तस्करीको अखडा : थप चार केजी भेटियो

दोलखा । चीनसँग सीमा जोडिएको दोलखाको लामाबगरस्थित फलाक नाकाबाट भित्रिएको थप चार केजी अवैध सुन आइतबार दिउँसो ४ः१५ बजे भेटिएको छ । दोलखाको विगु गाउँपालिका–१ स्थित लामाबगर बजार आसपास ढुङ्गाको चेपमुनि लुकाएर राखिएको अवस्थामा उक्त सुन बरामद भएको प्रहरी नायब उपरीक्षक दीपक खड्काले बताउनुभयो ।

फरार रहेका अशोक मगरलगायतले लामाबगर आसपास सुन लुकाएको आशंकामा खोजतलास गर्दा लामाबगर बजारस्थित निज मगर पहिले बस्ने गरेको घरको पछाडि ढुङ्गाको चेपमुनि घाँसको चपरीले छोपिएको अवस्थामा चार केजी सुन भेटिएको प्रहरीले जनाएको छ । सुन तस्करी आरोपमा यसअघि पक्राउ परेका केशर तामाङले अशोक मगरलगायतले पनि सुन बोकेको बयान दिएका थिए ।