निगमलाई भाडामा विमान, सधैं घाटाको व्यापार

घाटाको व्यापारलाई बुझाउन एउटा उखान छ– ‘चामलसँग पिठो साट्ने ।’ नेपाल वायुसेवा निगम यही उक्ति चरितार्थ गर्न उद्यत् देखिएको छ । न्यारोबडी जहाज बिग्रेको छ । छिटो बनाउनेतिर ध्यान छैन । जसकारण दुई महिनामा ६० करोड घाटा लागिसक्यो । फेरि ऊ अर्काे जहाज भाडामा लिने ध्याउन्नमा छ । यसलाई निगममा सधैं हुँदै आइरहेको कमिसनको खेलसँग जोडेर चर्चा गर्न हुन थालेको छ । नहोस् पनि किन ? आफ्ना जहाज ग्राउन्डेड (भूमिस्थ) हुँदा त्यसलाई सुचारु गर्नभन्दा नयाँतिर नजर लगाइहाल्ने जो भइरहेको छ । भएका जहाज ग्राउन्डेड हुँदै गएर भइरहेको घाटाले निगम नै ग्राउन्डेड हुने जोखिम उस्तै तीव्र गतिमा छ ।

५० अर्ब घाटा व्यहोर्दै त्यसको १० प्रतिशतको ब्याज तिरिरहेको निगमलाई उठाउन भएका जहाजको सेवा चुस्त बनाउनु र बजार विस्तार गर्नु नै उत्तम उपाय हो । विज्ञहरूले र पटकपटक गठन भएका अध्ययन समितिको राय पनि यही छ । तर, निगमले भइरहेकै गन्तव्यमा सकिने जति उडान पनि गर्न भ्याएको छैन, नयाँ गन्तव्य त परै । विज्ञले जहाज थप्न पनि नसुझाएका हैनन् । तर, त्यसभन्दा अघि गर्नुपर्ने कामचाहिँ निगमको व्यवस्थापनमा सुधार हो । कमजोर व्यवस्थापनकै बीच जहाज थप्ने हो भने ती पनि ग्राउन्डेडै हुने निश्चित हुन्छ । निगमले राज्यलाई ऋणको बोझ थप्ने पनि निश्चितै हुन्छ ।