प्रेस स्वतन्त्रताबिना लोकतन्त्र फस्टाउन सक्दैन : राष्ट्रपति

काठमाडौं । राष्ट्रपति रामचन्द्र पौडेलले प्रेस स्वतन्त्रताको पूर्ण प्रत्याभूति दिलाउन सके मात्रै लोकतान्त्रिक शासन व्यवस्था फस्टाउन सक्ने बताउनुभएको छ ।

प्रेस काउन्सिल नेपालद्वारा शनिबार राष्ट्रपति कार्यालय शीतल निवासमा आयोजना गरिएको काउन्सिलको ५४औं वार्षिकोत्सव तथा पुरस्कार वितरण समारोहमा प्रमुख अतिथिको रूपमा बोल्दै राष्ट्रपति पौडेलले कुनै पनि देशमा त्यो देशको प्रेस स्वतन्त्रताको अवस्थाले लोकतन्त्र कुन अवस्थामा छ भन्ने कुराको निक्र्यौल हुने बताउनुभयो । प्रेस स्वतन्त्रता बिना लोकतन्त्रको संस्थागत विकास हुन नसक्ने ठोकुवा गर्दै उहाँले लोकतान्त्रिक शासन व्यवस्था अवलम्बन गर्ने मुलुकहरूले प्रेस स्वतन्त्रताको गहिरो हेक्का राख्नुपर्ने आवश्यकता औंल्याउनुभयो ।