जर्मनीको ‘पेन्टा’ सपना सामु डेब्यूटेन्ट कुराकाओको चुनौती, को कति पानीमा ?

काठमाडौं । फिफा विश्वकप २०२६ को समूह ‘एफ’ अन्तर्गत आज साँझ पौने १० बजे क्यालिफोर्नियाको लेभीज् रंगशालामा एउटा यस्तो भिडन्त सुरु हुँदैछ, जहाँ अनुभव र नयाँपन, पुनर्जागरणको भोक र इतिहास रच्ने हुटहुटी एकै मैदानमा भिड्नेछन् ।

एकातिर चारपटकको विश्वविजेता जर्मनी लगातार दुई संस्करणको समूहचरणबाट बाहिरिएको पीडालाई पन्साउँदै पाँचौं उपाधि अर्थात ‘पेन्टा’को आकांक्षाका साथ मैदान उत्रँदै छ भने अर्कोतिर कीर्तिमानी डच प्रशिक्षक डिक एड्भोकाटको मार्गदर्शनमा पहिलोपटक विश्वकप खेलिरहेको कुराकाओ आफ्नो पहिलो संस्करणमै गहिरो छाप छाड्ने दाउमा छ ।