खुद्रा बजारमा सहज बन्दै चिनी

काठमाडौं उपत्यकामा उद्योगीसँग खरिद गरेको चिनी बजारमा आउन थालेको छ । खुद्रा व्यापार संघले बुधबार र बिहीबार उपत्यकाभित्र करिब ३५ टन चिनी (६ सय ९३ बोरा) ल्याएको हो । बुधबार तीन सय ८० र बिहीबार तीन सय १३ बोरा चिनी उपत्यकामा आइपुगेको संघले जनाएको छ ।

बुधबारबाट चिनी आएसँगै बजारमा चिनी सहज हुन थालेको खुद्रा व्यापार संघको भनाइ छ । खुद्रा व्यापार संघका कोषाध्यक्ष ध्रुव अधिकारीले बजारमा चिनी सहज हुन थालेको बताए । उनले भने, ‘अहिले केही सहज भएको छ, अझै पाँच सय बोरा चिनी आउने क्रममा छ, त्यसपछि बजार झनै सहज हुन्छ ।’