जनताको म्यान्डेट हेर्दा पुराना दल भित्र पनि नयाँ अनुहारलाई बढी रुचाइएको छ

मंसिर ४ गते भएको प्रतिनिधि सभा र प्रदेश सभा निर्वाचनको नतिजा आउने क्रम जारी छ। राजनीतिक दललाई जनताले दिएको म्यान्डेड हेर्दा प्रदेश र संघमा एकल पार्टीको सरकार बन्ने सम्भावना देखिँदैन। सरकार बनाउन दुई वा दुईभन्दा बढी दलको सहयोग चाहिने देखिन्छ। जनताको यो म्यान्डेट हेर्दा पुराना दलभित्र पनि नयाँ अनुहारलाई बढी रुचाएको र खासगरी दोहोर्‍याई, तेहेर्‍याई चुनाव लड्ने उम्मेदवार पराजित भएको देखिन्छ। जितेकाको पनि साँघुरो मतान्तर देखिन्छ।

केही नयाँ दलहरु राष्ट्रिय स्वतन्त्र पार्टी, राष्ट्रिय जनमत पार्टी र नागरिक उन्मुक्ति पार्टीको उदय भएको छ भने राष्ट्रिय प्रजातन्त्र पार्टी अलिकति पुरानो भए तापनि हिजो उसको संसदमा सानो उपस्थिति थियो। ती दल साइज अलिकति ठूलो बनाउन सफल भएका छन्। अहिलेको जनमत हेर्दा पुराना स्थापित दलहरुलाई सचेत हुन अर्थात् 'तिमीहरुले आफ्ना काम-कारबाहीमा सुधार ल्याएनौं भने हामी विकल्प खोज्छौं' भन्ने खालको सन्देश जनताले दिएका छन्।