नयाँ राष्ट्रपतिबाट अपेक्षा

संघीय लोकतान्त्रिक गणतन्त्र नेपालको तेस्रो राष्ट्रपतिको रुपमा रामचन्द्र पौडेल निर्वाचित भएका छन् । नेपाली कांग्रेस तथा सत्ताधारी गठबन्धनका साझा उम्मेदवारको रुपमा विजयी भएका नयाँ राष्ट्रपति एक कुशल, सुयोग्य एवं अनुभवी राजनीतिज्ञ मानिन्छन् । राष्ट्रपतिको पद गणतन्त्रको पर्याय हो । तसर्थ यो पदमा जाने व्यक्तिको पृष्ठभूमि, राजनीतिक सोच र व्यवहारले पनि आम नेपाली जनतालाई गणतन्त्रको अनुभूति दिलाओस् भन्ने जनचाहना रहेको हुन्छ । नयाँ राष्ट्रपतिबाट निष्पक्ष भूमिकाको निर्वाह हुने विश्वास नेपाली जनताको रहेको छ ।

हाम्रो पूर्वीय चिन्तन पद्धतिमा आगत (नवनिर्वाचित) लाई स्वागत गर्ने तथा विगत (निवर्तमान) लाई खुशी–खुशी बिदाइ गर्ने परम्परा रही आएको छ । नवनिर्वाचित राष्ट्रपति रामचन्द्र पौडेललाई बधाई दिने तथा स्वागत गर्ने कार्य भइरहेको छ भने निवर्तमान राष्ट्रपति विद्यादेवी भण्डारीको बिदाइ सम्पन्न भइसकेको छ । प्रत्येक व्यक्तिको जिम्मेवारी तथा कर्तव्य निर्वाहको समीक्षा इतिहासको कालखण्डमा हुने नै गर्दछ, तसर्थ निवर्तमान राष्ट्रपतिको कार्यकालको समीक्षा जनस्तरबाट पनि हुने नै छ र इतिहासले पनि गर्ने नै छ । यो स्वाभाविक विषय हो । राष्ट्र प्रमुख र सरकार प्रमुखको कार्यकालको विहङ्गम समीक्षालाई अन्यथा मान्न सकिँदैन । यसै सिलसिलामा पूर्वप्रधानमन्त्री एवं नेकपा एमालेका अध्यक्ष के.पी. शर्मा ओलीले प्रथम महिला राष्ट्रपतिको रुपमा विद्यादेवी भण्डारीको भूमिका गौरवपूर्व रहेको, जिम्मेवारी कुशलतापूर्वक निर्वाह गरेको, पहिलो कार्यकालको सफल र मर्यादित भूमिकालाई हेरेर राष्ट्रपतिमा दोहो¥याएको, उनको मर्यादा र आलोचना गर्नेहरुले बकवास गरेको भनाइ व्यक्त गर्नुभएको छ । एमालेमा ओलीलगायत उहाँ निकटका नेताहरुले राष्ट्रपति विद्यादेवी भण्डारीको कार्यको प्रशंसा गरेका छन् भने अरु पक्ष उनको कार्यसम्पादनप्रति आलोचनात्मक रहेका छन् ।