चढेर त हेर

तिमी अन्धकार भन्छौ
म संसार उज्यालो देख्दछु
अझै उज्यालो देख्दछु नेपाल
म जस्तै तिमीसँगको भेटमा
म आत्तिन्छु बेस्सरी
उज्यालो मुहारमा जुर्मुराएको
अँधेरी देख्दछु अनि
मुस्कानमा नच्यातिने ओठ
अँधेरीमा लुकेको रश्मि
त्यो उज्यालोको
आशातीत म बेस्सरी हाँस्दछु
पिठ्युँमा बोकेको झोला
फुत्त भुँइमा खस्दा
छरपष्ट पोखिन्छन् लक्ष्यहरु
म टिप्न खोज्छु
ऊ सहयोगी आउँछ
एउटै कुरा पाउँछ
'तिमीलाई हँसाउन सकूँ'
'त्यो चस्मा खोल्न सकूँ'

तिमी रुवाई अनि कोलाहलको कुरा गर्छौ
म त्यसैमा सन्नाटा देख्दछु
उडिरहेका चङ्गा देख्दछु
अनि रमाइरहेका सपना
तिमी सपनाको पोको झोलामा कोचेर
अर्काको सपनामा सफर गर्छु भन्दा
म निशब्द हुन्छु
बुझ्छु कुरा नबुझेझैं गर्छु
तिमी भन्छौ हवाईजहाज
म भन्छु सपना
फेरि भन्छौ हवाईजहाज
म - आफ्नो सपना
तिमी डेग चल्दैनौ
तिम्रा ओठ चलायमान हुन्छन्
मेरा कानले धर्म छाड्छन्
आँखाले भेउ पाइहाले
उही हवाईजहाज
म हार मान्दिन
भन्छु आफ्नै सपनाको जहाज
मन्द मुस्कानमै थपिदिन्छु
चढेर त हेर..!!
____________
हाम्रो पात्रोको 'ब्लग/साहित्यमा' यदि यहाँहरू पनि अाफ्ना लेख रचना सार्वजनिक गर्न चाहनुहुन्छ भने हामीलार्इ तपार्इको पुरा नाम, ठेगाना, फोटो र तपाइको व्यक्तिगत फेसबुक पेज, ब्ल्ग पेज अथवा अन्य कुनै लिंक समेत saahitya@hamropatro.com मा इमेल पठाउनुहोस्|