व्यक्तिको जन्म समयमा सौर्यमण्डलमा रहेका ग्रहहरूको प्रभावबाट त्यस व्यक्तिको जीवन के कस्तो रहने छ भन्ने कुराको निर्क्योल ज्योतिष शास्त्रबाट पत्ता लगाउन सकिन्छ । जन्म कुण्डलीबाट व्यक्तिका जीवनमा आउने विविध पक्षको विश्लेषण गर्न सकिन्छ, जसमध्ये सजाय योगपनि महत्त्वपूर्ण योग हो ।
विशेषगरी जन्म कुण्डलीमा रहेका १२ भावमध्ये १२ औं भावबाट बन्धन र मुक्तिको विषयमा अध्ययन गरिन्छ । १२ भावलाई ब्यय भावपनि भनिन्छ । ब्यय भावमा कुनै ग्रह नहुनु राम्रो मानिन्छ । द्वादश स्थान लग्नको ब्यय स्थान भएका कारण शारीरिक मानसिक एवं बौद्धिक ब्यय गराउने कार्य यस भावबाट हुने गर्दछ । द्वादश भावमा राहुको उपस्थिति रहनु, राहुबाट दृष्टि हुनु, द्वादशेस कमजोर रहनु वा राहुसँग योग बनाउनु सजाय योग मानिन्छ ।
राहोस्तुदृग्योग यदा ह्यन्त्ये राहुस्थनाथस्य तथैव भूयात् ।
अन्याधिपश्चेत् विर्येण हीन: कारागृहे तस्य स्थितिर्हिनूनम् ।।
सजाय योग सृजनाका कारण व्यक्ति राम्रो पोजिसन, उच्च पदमा बहाल रहँदा रहँदै पनि विविध परिस्थिति बस कारागारसम्म पुग्नु पर्दछ । द्वादशेश शुभ ग्रह हुनु उपयुक्त मानिन्छ र त्यस स्थानमा ग्रह नरहनुलाई पनि उत्तम मानिन्छ । द्वादश स्थानमा रहेका पाप ग्रह हानिकार अर्थात् धेरै अनावश्यक खर्चालु बनाउछ । सूर्य द्वादश स्थानमा कोट कचरिमा पैसा खर्च हुने पैतृक सम्पत्तिमा पनि विविध विवाद रहने कुराको संकेत गर्दछ ।
यो योग विशेष गरी राहु द्वादशेश एवं कुण्डलिमा खराब स्थितिमा रहेको सूर्य एवं मंगलको दशा अन्तर्दशा प्रत्यन्तर्दशामा आफ्नो खराब प्रभाव प्रस्तुत गरि जातक वा व्यक्तिको जीवन, करियर बर्वाद बनाउने कार्य गर्दछ । त्यसैले आफ्नो कुण्डलीमा ग्रहको अवस्था के कस्तो छ भनी निश्चिन्त रहनु राम्रो हुन्छ ।
कतै हाम्रो कुण्डलीमा यस्तो योग त छैन ! छ भने समस्या आउनु पुर्वनै उचित उपचार गर्नु आवश्यक छ । ज्योतिष शास्त्रले दिशा निर्देश गरे आनुसार कार्य गर्दै विविध उपचार गर्नु आवश्यक छ । सजाय योगको शिकारबाट बच्न लन्नेशको पक्षमा सकारात्मक कार्य गर्नु । इमानदारितालाई प्राथमिकता दिनु । सूर्य बलवान गराउने कार्य गर्नु । सूर्यनारायणको उपासना गर्नु पर्दछ । द्वादशेश अधिपतिको पुजा आराधना गर्नु एवम् बिज्ञ ज्योतिषको परामर्श लिनु अति आवश्यक पर्दछ । उचित समयमा मार्ग निर्देशन लिदै कार्य सम्पादन गरेको खण्डमा सजाय योगबाट बच्न सकिन्छ ।।
ज्योतिषाचार्य पुरुषोत्तम घिमिरे
ghimirepurupg@gmail.com
Liked by:
